Magakonsulta pa ang mga konsehal sa mga former Masskara Queen kag mga historians’ antes maghimo sang resoluyon ukon ordinansa nga magadeklarar sang opisyal nga title para sa pageant sang Bacolod Masskara Festival.
Madumduman nga una nga nagpropose ang Bacolod Yuhum Foundation sang mga mahimo ipangalan sa pageant nga ginalakipan sang “Miss Bacolod Masskara,” “Miss Super City Bacolod,” “Miss Bacolod Masskara Queen,” apang kahapon, gin-aprubahan ni Bacolod City Mayor Alfredo “Albee” Benitez ang “Miss Bacolod.”
Ini bangod Miss Bacolod lamang ang ginadala nga titulo sa pagcompete sang mga beauty queen sa National Pageants.
Apang aminado si Councilor Jason Villarosa, chairperson sang Committee on Tourism sa Sangguniang Panlungsod nga sila ang dapat magkonsulta anay sa mga former Masskara Queen sa ila nga sentimiyento.
Ini bangod 45 ka tuig na nga Miss Bacolod Masskara ang tawag sa pageant, kag madamo ang nagakwestyon kun dulaon ang term nga Masskara.
Suno kay Villarosa, ini ang himuan man nila sang resolusyon agud mangin ordinansa agud indi na mahapos maligwat ang pangalan, magluwas na lamang kun may magduso sang amendment.
Paathag sini nga may ordinansa naman ang iban nga mga programa may kaangtanan sa Bacolod Masskara Festival kaangay sang pagpatigayon sang Masskaralympics kag Masskanamit Food Festival.
