Ginkumpirmar sang isa sa mga elected city officials sa idalom sang grupo progreso nga nagtambong sila sa inagurasyon ni Bacolod City Mayor Alfredo Benitez sang Biyernes, Hulyo 1.
Sa interview sang Bombo Radyo Bacolod kay Councilor Renecito Novero, ginhatagan sila sang imbetasyon sang invitation committee sang Benitez administration kag wala man sang conflict sa ila mga schedule gani gintambungan nila ini.
Suno kay Novero, ginghatagan nila honor ang imbetasyon nga ila nabaton kun sa diin nagtambong sila kaupod kanday Councilor Israel Salanga, Cindy Rojas kag Em Ang.
Suno diri ang nasambit nga event ang introduction man sang bag-o nga set sang mga city officials gani nagakadapat lamang nga magtambong.
Ginpahayag man sini nga wala man sila sang kaawayon sa bag-o nga administration kag ang election partisanship ang natapos na.
Suno diri ang ila tinutuyo sa karun ang mag-alagad sa pumuluyo gani magapartisipar ini sa tanan nga mga programa sang bag-o nga administration para sa kaayuhan sang mga pumuluyo sa syudad sang Bacolod.
Nakaestoryahanay man sila kadali sang alkalde bangud masako man ang tanan sa inagurasyon.
Ginpahayag man sini nga ang kaundan sang speech ni Bacolod City Mayor Albee Benitez ang para man sa kaayuhan sang mga pumuluyo sa syudad sang Bacolod.
Suno kay Novero sa Sangguniang Panlunsod sang Bacolod City siya ang nabilin nga nagaisahanon nga abugado kag pinakamagulang sa mga konsehal.
Suno diri indi niya role nga magbais sa konseho kundi ang maglaygay kun kinahanglanon.
Aminado man ini nga wala gid sini napatapos ang inagurasyon bangud indi maayo sa iya mata ang lightings sa event bangud nagakarap ang iya panulukan gani temprano pa ini nagpauli kag nagpahuway.
