Nagalaom ang mga konsehal sang Bacolod City nga mangin maayo na ang pagserbisyo sang PrimeWater sa idalom sang bag-o nga management matapos nga ini ang ginbaligya.
Sa interview sang Bombo Radyo Bacolod kay Councilor Thaddy Sayson, ginpakamaayo sini nga may yara na sang bag-o nga tag-iya ang PrimeWater.
Suno kay Sayson, ini ang maayo indi lang para sa Bacolod City kundi para man sa bug-os nga Pilipinas, kun sa diin nagaserbisyo ang nasambit nga water concessionaire.
Suno sa konsehal, sa impormasyon nga iya nabaton, nabakal na ang PrimeWater apang wala pa mahibaluan kun ano ang legal agreement kag kun amo sa gihapon nga pangalan ang gamiton sang private company karun nga lain na ang nagapanag-iya.
Ginaekspektar sini nga bangud bag-o na ang tag-iya, mas maayo naman ang serbisyo nga ihatag sa mga consumers kun ipaanggid sa nakaligad nga management.
Samtang para naman kay Councilor Homer Bais, maayo nga serbisyo lamang ang ginapangayo sang mga pumuluyo.
Suno kay Bais, ang mga pumuluyo ang wala sang labot kun sin-o man ang magapanag-iya sang water concessionaire ang importante sa mga ini nga mahatagan sang malimpyo kag 24/7 ang supply sang tubig.
Suno diri dapat balikan ang promisa kun ngaa ginprivatize ang BACIWA, kag kun mahatag lamang nila ang ginapangayo nga serbisyo para sa iya wala naman sang may makwestyon kun sin-o ang naga-manage sang PrimeWater.
Suno naman kay Councilor Celia Matea Flor, maayo man nga nabakal na ang PrimeWater bangud sa personal sini nga eksperyensya sa lima ka tuig nga ang nasambit nga water concessionaire ang nagaserbisyo, wala gid sila sang tubig kag napilitan nalang ang mga ini nga magpatasok agud nga may magamit.
Suno kay Flor wala man sang may nakahibalo kun kay sin-o ini ginbaligya apang ginalauman sini ang excellent service para sa mga konsumidor sa ciudad sang Bacolod.
