May caucus ang Sangguniang Panlungsod sang Bacolod antes ang una nga regular session sa bulan sang Hulyo agud mahibaluan sang minorya sa Konseho kun ano ang mga komitiba nga nabilin para sa ila.
Kaina sang aga, nag-istoryahanay sanday Vice Mayor El Cid Familiaran, Councilor Al Espino kag former Vice Mayor Thaddy Sayson nga isa man ka councilor-elect kun sa diin ila nga gin-istoryahan ang posible nga committee chairmanships.
Sa interview sang Bombo Radyo kay Familiaran, ginpanindugan sini nga bilang legislative body, independent ang Sangguniang Panlungsod kag makatrabaho ini bisan sin-o man ang nagapungko nga alkalde.
Suno kay Familiaran, indi niya mapre-empt ang desisyon sang SP, apang kun para man lang sa kaayuhan sang tanan, suportahan sang minority ang mga programa sang executive.
Suno diri, may caucus sa July 4 ukon July 3 antes ang una nga session sa Hulyo 6, agud mahibaluan sang minority kun ano ang bilin nga committee nga ila uyatan.
Santo sa tradisyon, ang majority ang nagapili sang committees kag ang nabilin nga komitiba ang uyatan sang minority.
Nakabutang naman sa internal rules and regulations nga ang kada konsehal ang dapat may duha ka komitiba nga ginauyatan.
Sa una nga session sang SP suno kay Familiaran, may adoption sang internal rules apang subject ini sa amendments sa sulod sang 90 dias.
