Ginpagwa na sang Senate impeachment court kahapon ang mga pangalan sang mga legal experts nga magahatag sang ila mga komento kag opinyon natuhoy sa 16-vote threshold agud i-convict si Vice President Sara Duterte sa iya nga impeachment trial.
Ginpahayag ni impeachment court spokesperson Regie Tongol nga nakumpirmar na ang partisipasyon sang mga eksperto nga mag-atubang sa korte sa Setyembre 16 agud ipresenta ang ila mga legal analysis.
Kalakip sa mga legal luminaries amo sanday:
Retired Supreme Court Chief (SC) Justice Artemio Panganiban
Retired SC Chief Justice Reynato Puno
Retired SC Associate Justice Adolf Azcuna
Samtang, gin-secure man ang partisipasyon ni retired SC Chief Justice Hilario Davide via submission sang legal memorandum sa baylo nga magtambong sa personal, suno kay Tongol.
Si Davide ang nagserbe man bilang presiding officer sang impeachment trial ni anay President Joseph Estrada.
Suno kay Tongol, ang impeachment court nag-umpisa nga magpadala sang issuance kag service of orders paagi sa Office of the Clerk of Court, santo sa direktiba ni Presiding Officer Francis “Chiz” Escudero nahanungod sa pag-appoint sang amici curiae ukon “Friends of Court.”
Pahayag ni Tongol, nagapangayo sang bulig ang impeachment court sa mga legal nga eksperto agud makakuha sang legal ukon konstitusyunal nga basehan kag indi lamang basta ginapakot ang kinahanglan nga boto para sa conviction.
Hatagan man sang kahigayunan ang mga Senator Judges nga basahon kag usisaon anay ang mga nakasulat nga legal advice ukon opinyon nga isumiter sang counsel antes mag Setyembre 16.
