Ginahanda na sang Local Government Unit (LGU) sang syudad sang Bago, Negros Occidental ang pagpatigayon sang mga tikang santo sa contingency plan sa tion nga mag-alburuto ang Bulkan Kanlaon.
Sa interview sang Bombo Radyo Bacolod kay Bago City Disaster Risk Reduction Management Office (DRRMO) head Dr. Merijene Ortizo, ginpahayag sini nga sang Hunyo 22, wala sila sang nabatyagan nga pagtay-og sa lugar apang may yara sang narehistro sa intensity meter sang opisina sini.
Ginpahibalo man sila ni Engineer Mari-Andylene Quintia sang Philippine Institute of Volcanology and Seismology (PHIVOLCS) nga may yara sang nadetect nga abnormalities sa bulkan.
Kasunod sini, nagpatigayon sila sang emergency meeting agud ireview ang contingency plan nga ginhimo sang syudad.
Gintumod man sang DRRMO ang at risk nga bahin sang syudad.
Ginpasakaan man sini sang staff ang mga naidentify nga at risk sa tion nga mag-alburoto ang bulkan agud magcoordinate sa barangay kag makapatigayon sang information dissemination campaign.
Ini ang ginalakipan sang Brgy. Ilijan kag Brgy. Mailom.
Gintumod naman ang mga eskwelahan nga sarang mahimo nga evacuation center.
Gintumod man sang mga ini ang sahi sang transportasyon nga mahimo gamiton sa pag-evacuate sa mga residente.
Samtang may yara man sang panugyan si Ortizo sa mga pumuluyo sa tion sang kalamidad.
Ginpahayag sini nga dapat ang tagsa ka pamilya ang makahibalo sang dapat himuon sa tion nga may kalamidad kaangay sang vulcanic eruption.
Ang tagsa ka mga miyembro sang pamilya suno sa iya ang dapat may yara sang ginapreparar nga emergency kit.
