Preparado na ang mga Local Government Units nga malapit sa Bulkan Kanlaon sa padayon nga increase sa siesmic activity sa bulkan.
Sa interview sang Bombo Radyo kay John De Asis, La Castellena Municipal Disaster Risk Reduction and Management Office (MDRRMO ) head, padayon ang ila paghatag sang update sa mga barangay kag ila ginahalongan nga insakto ang mapadangat nga impormasyon.
Suno diri, apat ka brgy sa banwa ang ginalauman nga maapektohan sang pagplupok sang bulkan.
Ang apat ka mga brgy nga ginalakipan sang brgy Biak na Bato, Cabagnaan, Mansalanao, kag Masulog ang nasulod sa 4km radius permanent danger zone.
Pahayag ni De Asis, suspendido ang klase sa tanan nga lebel.
Sa karun, wala pa sang gin-evacuate nga mga residente, apang may yara sang siyam ka pamilya nga yara sa gihapon sa evacuation center humalin sang naglupok ang bulkan sang Hunyo 3.Samtang, ginsuspende man ang klase sa apat ka barangay sa ciudad sang La Carlota subong nga adlaw bangod sa mga paglinog nga naeksperyensyahan gikan sa Bulkan Kanlaon.
Sa interview sang Bombo Radyo kay La Carlota City Mayor Rex Jalando-on, nabatyagan ang volcanic earthquake kag baho sang asupre sa ciudad.
Suno diri, ginpakamaayo na lamang sini nga suspendihon ang klase sa Brgy Araal, Yubo, Haguimit, kag San Miguel.
Pahayag ni Jalando-on, padayon ang ila monitoring kag preparado na ang ciudad sa pagresponde inkaso nga maglupok ang bulkan.
Apang, aminado ini nga kun maglupok ang bulkan, dako ang epekto sini sa supply sang tubig sa ciudad kag nagpasalig naman ini nga may nakastandby nga water trucks.
Tatlo naman ka barangay ang apektado sa ciudad sang Bago.
Suno kay City Disaster Risk Reduction and Management Office (CDRRMO) Head Dr Mary Jane Ortrizo, ginpadangat na sini sa mga Punong Barangay ang papalapta sang impormasyon sa mga residente angot sa status sang bulkan kag mga preparasyon nga himuon.
Suno diri, wala sang class suspension sa ciudad apang tatlo ka brgy ang ginalauman nga maapektohan pananglitan nga maglupok ang bulkan.
Ini ang ginalakipan sang Brgy Ilijan, Mailum kag Binubuhan.
Nakahanda naman ang mga food kag non food items kag response team sang CDRRNMO sa pagresponde.
