Nagpagwa sang Memorandum Circular No. 2020-145 ang Department of the Interior and Local Government nga nagamando sa mga gobernador, alkalde, punong barangay kag pinuno sang Sangguniang Panlungsod nga padayunon ang road clearing operation nga una na nga naumpisahan apang nauntat bangud sa coronavirus pandemic.
Sa interview sang Bombo Radyo kay DILG Region 6 Director Juan Jovian Ingeniero, ginpahayag sini nga nakabaton sila sang memorandum nga padayuhon ang second round sang road clearing operation sumugod Nobyembre 16, 2020 tubtob Enero 15, 2021 bangud luyag ni Presidente Rodrigo Duterte nga mangin matinlo ang lakat sang trapiko sa mga dalanon.
Suno kay Ingeniero, dako ang papel sang barangay para sa clearing operations bangud sila ang frontliner nga nakakita sang sitwasyon sa ila nasakupan.
Apang sa DILG Head, ini ang igaplementar lamang sa mga lugar nga napaidalum sa modified general community quarantine (MGCQ) samtang partial implementation naman sa mga lugar nga napaidalum sa GCQ.
Suno diri, indi ini anay pag-ipatuman sa mga lugar nga napaidalum sa modified enhanced community quarantine (MECQ) kag ECQ bangud may mga measures pa ini kaangay nga mga check-up points kag border control nga ginapatuman.
Gindugang man ni Ingeniero nga isa ka bulan matapos masuguran ang second round sang road clearing operation, sa Disyembre 15, magahatag sang report ang mga barangay sa city ukon municipal DILG offices kag pagka-Enero 18 tubtob 22, 2021, may patigayunon nga validation.
Nagpanawagan man ini sa mga natungdan nga ipatuman gid ang nasambit nga memorandum circular agud nga mangin matawhay na ang mga dalanon.
