Ginabanta sang mga kapulisan sa Cadiz City nga magadangat sa kapin 300 mil ang mga pumuluyo nga magatambong sa highlights sang Dinagsa Festival sa Enero 28.
Sa interview sang Bombo Radyo Bacolod kay Police Lt. Col John Joel Batusbatusan, officer in charge sa Cadiz City Police Station, wala gid sang kinagamo sa opening salvo sang Dinagsa Festival nga nag-umpisa Enero 12 kag magatakop Enero 28.
Ang opening salvo ang gin-umpisahan sa pagpatigayon sang street party kag drum beating competition nga gintambungan sang indi magnubo tres mil ka mga indibidwal.
Gindayaw man ni Batusbatusan si Cadiz City Mayor Salvador “Bading” Escalante sa nangin madinalag-on nga opening salvo.
Suno sa hepe, magareport ini sa Negros Occidental Police Provincial Office (NOCPPO) sa Lunes, agud ipresentar ang security plans kag logistics sa Dinagsa Festival 2024.
Ini agud maplastar kag maaprubahan ni NOCPPO Director Police Col. Leo Pamittan ang request para sa augmentation sang mga police personnel, sa aviation support group (ASG), traffic personnel, security coverage kag border controls nga magadangat sa 500 ka tawo.
Ginapangabay naman ni Batusbatusan sa mga festival goers nga magkooperar agud mangin malinong ang selebrasyon sang Dinagsa Festival.
