AUSTRALIA – Makaligad ang halos duha ka tuig, mas may kahilwayan na sa karon ang mga magkahagugma sa Australia nga maglagaw sa mga parke ukon restaurant kadungan sang Valentine’s Day sa Pebrero 14.
Sa interview sang Bombo Radyo kay Bombo correspondent Johnny Armas direkta sa Sydney, Australia, naghalog na ang restriksyon sang pungsod matapos ang halos duha ka tuig nga closure sang border kag ginalauman naman nga mas bukas na ang selebrasyon sang Valentine’s Day.
Bangud sini, may freedom na ang magkahagugma nga magkadto sa mga parke, magbakal sang jewelry bilang regalo, bulak kag iban pa nga bagay nga igahatag sa ila palangga sa kabuhi.
Kalabanan naman nga mga Pinoy nga Katoliko ang magasimba sa Lunes sang aga, magakadto sa mga parke, ukon restaurant sa higad sang dagat.
Kaangay sang nakaandan nga buluhaton sang mga lalaki suno kay Armas, uso gihapon ang paghatag sang bulak kag chocolates sa ila nga nobya ukon asawa.
Sa karon, puno na ang display sang bulak kag chocolates sa Australia kag madamo naman ang nagabakal sang wines kag iban nga alcohol nga imnon kadungan sang selebrasyon.
Samtang, indi lang lovers ang nagacelebrate sang Valentine’s Day sa Australia bangud ginatudluan man ang mga kabataan nga maghimo sang hand-made flowers nga ihatag sa mga ginikanan.
Suno kay Armas, ginapaabot gid sang mga Aussie ang adlaw ni Saint Valentine apang sa karon, indi allowed ang ballroom dancing kag concerts kag tuman kahugot ang gobyerno sang Australia sa pagpatuman sang nasambit nga pagsulundan.
