Nagpadulong sa City Agriculture’s Office sang Bacolod ang mga mananagat kag manugnguma nga wala nakabaton sang ayuda sadtong pagbisita ni President Ferdinand ‘Bongbong’ Marcos Jr sa ciudad.
Sa interview sang Bombo Radyo Bacolod kay Mary Rose Aguirre, miyembro sang asosayon sang mananagat sa Brgy Banago, Bacolod City, sang Huwebes pag-abot sang presidente yara sila sa UNO-R nagahulat apang may nagpalapit sa ila nga isa ka babayi nga nagpakilala nga siya ang nagikan sa region office kag ginpangkuha ang ila nga form sang Department of Social Welfare and Development (DSWD).
Sila ang ginhambalan nga magkadto na lamang sa City Agriculture Office bangod nga siya na mismo ang maga-akomodar sa ila.
Suno kay Aguirre, kahapon, alas 7:00 pa lamang sang aga yara ini didto para magpila kaupod ang iban nga mga mangunguma kag mananagat gikan sa Brgy Banago kag Brgy Singcang Airport.
Apang, tubtob sa hapon wala gid sila sang may nakuha nga ayuda.
Suno pa diri, pagbalik sang ila nga mga form may yara na ini sang gisi sa bahin kun diin nagperma ang social worker.
Pahayag ni Aguirre, nagpasimpalad lamang sila nga magkadto sa ginalauman nga sila ang makabaton man sang P10,000 nga cash assistance, apang ginbasehan sa gihapon amo ang master list.
Dugang pa sini, may yara sang ginpang-releasan sang assistance sa City Agriculture Office bisan nga wala sang pangalan sa master list kag suno diri may yara man sang nakakuha sang ayuda sang Huwebes bisan nga sila ang miyembro sang Pantawid Pamilyang Pilipino Program (4Ps), nga dapat indi sila kwalipikado.
Plano naman nila sa karun amo nga magpadulong sa Bacolod City Government para mangayo sang bulig kay Bacolod City Mayor Alfredo ‘Albee’ Benitez.
