Nakapauli na sa ila tagsa ka pamilya ang duha ka soltero nga naanod gikan sa kadagatan sang Cadiz City padulong sa Masbate City sa kasagsagan sang Bagyo Kristine.
Madumduman nga namissing sanday Edwin Hinojales, 17 anyos, Grade 11 student kag Joren Parochel, 22 anyos, lunsay residente sang Purok Pasil, Talabahan, Barangay Zone 1, Cadiz City matapos magpalawod alas-11:00 sang udto sang Oktubre 24.
Sa interview sang Bombo Radyo Bacolod kay Coast Guard Commander Jansen Benjamin, Commander sang Philippine Coast Guard station – Northern Negros Occidental, tatlo ka adlaw kag duha ka gab-i nga nagpa-utaw utaw sa dagat ang duha tubtob nga sila ang masagop sang mga mananagat sa Masbate sang Oktubre 26.
Suno kay Benjamin, nahibaluan nila nga nasapwan na ang duha pinaagi sa social media.
Ginapinsar pa sang mga ini nga sila ang sinemana na sa lawod bangod indi na mamonitor ang dalagan sang oras kadungan pa nga wala sang pagkaon kag tubig gani sila ang nagapalangluya naman sang makit-an.
Ang duha ang temporaryo man nga gin-amuma sang PCG – Masbate kag Masbate City Government.
Suno kay Benjamin, nadelay ang ila nga pagsugat sa duha ka biktima, gani ginapasalamatan na lamang sini nga may tag-iya sang barko sa Cadiz City kag sa koordinasyon man ni Mayor Salvador “Bading” Escalante, ang pribado nga barko ang gingamit sa pagsugat sa duha ka biktima.
Sa karun, sila ang lunsay yara na sa luyo sang ila nga mga pamilya.
Ginapakamaayo ni Benjamin nga tanan nga reported missing sa kadagatan, kalakip ang duha gikan sa Valladolid, duha sa Brgy Banago, Bacolod City kag ang duha sa Cadiz City ang lunsay hilway nga narescue.
