Dako ang pagpasalamat sang mga mangingisda sa Barangay Sum-ag sa ciudad sang Bacolod sa bulig nga ginhatag sa ila sa idalom sang Presidential Assistance for Farmers, Fisherfolks and Families (PAFFF).
Sa interview sang Bombo Radyo Bacolod kay Punong Barangay Rodney Carmona, dako ang pagpasalamat sini kay President Ferdinand ‘Bongbong’ Marcos Jr sa bulig nga ginhatag sa mga mangingisda.
Ang mga mangingisda ang makabakal na sang dugang nga galamiton sa pagpanagat kaangay sang pukot kag mga kinahanglanon sa bangka.
Samtang ang mga farmers naman ang makabakal sang dugang nga galamiton para sa gardening ukon pagpanguma.
Suno kay Carmona, dako ini nga bulig para sa mga mangingisda kag nagalaom ini nga tipigan sang mga benepisyaryo ang ayuda nga ila nabaton kag I-invest sang mga ini sa ila kinahanglanon.
Samtang dako man nga bulig sa mga mangingisda sa Barangay Banago sa ciudad sang Bacolod ang P10,000 cash nga ayuda sa idalum sang Presidential Assistance for Farmers, Fisherfolks and Families (PAFFF).
Sa interview sang Bombo Radyo Bacolod kay Punong Barangay Arnel Benjamin sang Barangay Banago, ang mga beneficiaries ang yara sa listahan kag ang ayuda ang ginkuha sa Department of Agriculture.
Suno kay Benjamin, tanan nga mga yara sa listahan nga qualified sa ayuda ang napanghatagan kag wala man sang wala nakabaton.
Ginpahayag man sini nga dako ang pagpasalamat sini nga ang mga pigado nga mga mangingisda ang nahatagan sang ayuda.
Ang P10,000 nga cash nga nabaton sang mga ini ang dako gid ang nabulig sa ila.
Ginpasalamatan sini si President Ferdinand ‘Bongbong’ Marcos Jr., kag Bacolod City Mayor Alfredo Benitez sa paghatag sang ayuda.
