Ginkompirmar sang Executive Assistant to the Mayor sa syudad sang Bacolod nga ang mga manugbaligya sang palupok ang naggawad na sang special permit apang kinahanglan lamang nila sundon ang One Entrance One Exit kag magsunod sa minimum health protocols santo sa rekomendasyon sang Emergency Operations Center sang syudad.
Sa interview sang Bombo Radyo kay Executive Assistant to the Mayor Ernie Pineda, sa tion nga makompleto na sang vendors ang requirements kag makagawad na sang special permit, mahimo na ini umpisa sa pagbaligya.
Suno diri, antes matapos ang special permit magaagi anay sa Bureau of Fire Protection-Bacolod kag Bacolod City Police Office (BCPO) bangud sila ang magarekomendar sang lugar nga butangan sang ila mga baligya.
Madumduman nga gin-aprubahan na sang Sangguniang Panlungsod ang pagbaligya kag pagretail sang firecrackers kag pyrotechnics sa ciudad.
Ginpahayag ni Pineda nga pwede makabaligya kag makaretail sang mga palupok sa designated area nga nahamtang sa Pope John Paul II tower.
Dugang pa ni Pineda nga may yara naman sang rekomendasyon nga ginpagwa ang Emergency Operations Center (EOC) angot sa pagmaintain sang minimum health protocols sa balaligyaan.
Suno sa iya, may yara sang memorandum order no. 123 nga ginpapanaog si Mayor Evelio “Bing” Leonardia agud nga magpahanugot sa pagbaligya sang palupok sa designated area.
Nahibaluan nga wala sang may makabaligya sang palupok sa tiyangge bangud sa tion nga madakpan sang otoridad, may yara sang multa nga P20 mil tubtob 30 mil kag pagkapriso nga anum ka bulan tubtob isa ka tuig kag makompromiso man ang ila nga business permit.
