Kadungan sang nagahilapit nga pagsaguta sang bag-ong tuig nakaplastar na ang mga manugbaligya sang fireworks kag firecrackers sa probinsya.
Sa interview sang Bombo Radyo Bacolod kay Bellardo Britania Jr., isa sa tag-iya sang kiosk sa ginabaligyaan sang firecrackers/fireworks sa Barangay Zone 14, Talisay City, Negros Occidental, mahimo naman sila makaumpisa pamaligya sang mga palupok.
Suno diri, nagabaligya na siya sang palupok sa sulod sang walo ka tuig, apat ka tuig sa Talisay City Plaza antes ginsaylo sa Zone 14 B, Talisay City.
Suno kay Britania, nagasunod sila sang health protocols, no facemask, no faceshield, No entry.
Hugot man nga ginabantayan nila ang kiosk bangud ginadumilian man ang mga menor de edad nga magsulod sa babaligyaan.
Ginasunod man nila ang mga guidelines sang Bureau of Fire and Protection kag Philippine National Police agud nga makabaligya sang palupok.
Ini ang ginlakipan sang drum nga puno sang tubig, duha ka sako nga balas ukon mahimo nga magsobra kag fire extinguisher.
Ginapatuman man ang One Entry, One Exit sa balaligyaan sang palupok agud indi na magbalik-balik ang mga nakabakal sang palupok.
Sa banwa sang Hinigaran sila nagakuha sang supply sang mga palupok.
Aminado man ini nga naggamay ang ila nga baligya bangud ginabanta kapin 40 porsyento nagbuhin sa ila nga stock.
Natalana subong nga adlaw nga balikan sang Bureau of Fire Protection (BFP) ang ila nga kiosk agud tsekyaron.
