Magapatigayon sang psychological debriefing ang Department of Social and Welfare Development kag Cadiz City Disaster Risk Reduction Management sa Cadiz East Elementary School angot sa pagkapatay sang grade 2 student matapos ini nga madunlan sang Biyernes, Abril 14.
Sa interview sang Bombo Radyo kay Cadiz Division Superintendent Arlene Bermejo, masami nga yara ang amay sang bata sa eskwelahan apang sadtong adlaw sang natabo ang insidente wala didto ang amay.
Suno diri, natukiban sa bag sang bata ang pila ka putos sang chubby nga dolce nga wala na sang unod.
Ang dolce ang nahibaluan nga ginbakal sang iya nga lola bangod nga paborito ini sang iya nga apo.
Pahayag ni Bermejo, nabaton naman sang mga ginikanan ang natabo ilabi na nga wala man sang may luyag nga matabo ang insidente.
Sa Lunes, magapatigayon sang psychological debriefing ang buluthuan para sa mga manunudlo kag estudyante ilabi na sa classmate sang grade 2 student nga yara mismo sa sulod sang classroom sang natabo ang insidente.
