Gindayaw sang Department of Education ang mga manunudlo kag iban pa nga poll workers para sa commitment kag civic spirit nga ila ginpakita sa pagpatigayon sang 2025 Elections.
Suno sa ahensya, sa kapin 758,549 poll workers nga gindeploy sa bilog nga pungsod, masobra 660,000 ang DepEd personnel, nga nagabulig sa pagpasiguro sang luwas, patas kag orderly midterm polls.
Ginpasalamatan ni Education Secretary Sonny Angara ang tanan nga mga manunudlo, poll workers kag school staff nga nagbulig kag nagbantay sa Eleksyon.
Suno sa iya, bangud sa mga ini, nangin maayo kag safe ang proseso gani saludo ang tiglikom sa mga manunudlo.
Ginpahayag man sang DepEd nga ang task force sini, nga naga-operate 24/7 humalin Mayo 11 tubtob 13, ang nakarekord sang kabug-usan nga 603 election-related incidents.
Kalabanan sa mga reports ang nagikan sa Zamboanga Peninsula, Bangsamoro Autonomous Region in Muslim Mindanao (BARMM), kag National Capital Region (NCR).
