Nagtipon ang mga manunudlo sa SMX Convention Center Bacolod subong nga hapon agud iselebrar ang World Teachers Day.
Sa interview sang Bombo Radyo Bacolod kay Richard Gelangre, presidente sang Bacolod City Public School Teachers Federation, gin-organize sang Department of Education-Division of Bacolod City kag sang Bacolod City Public School Teachers Federation ang ginpatigayon nga programa.
Suno kay Gelangre, natigayon ang pagtililipon sa bulig kag suporta sang Department of Education- Division of Bacolod City sa pagpamuno ni Dr. Reynaldo Gico, Assistant Schools Division Superitendent kag niya bilang presidente sang Bacolod City Public School Teachers Federation (BCPSTF).
Suno kay Gelangre, kalakip sa ila nga bisita sanday Maximo Montero, chairman sang Region 6 Act Union, Bacolod City Lone District Congressman Greg Gasataya, Abang Lingkod Representative Stephen Paduano, Bacolod City Mayor Alfredo Benitez kag Victor Hilado Neri, anay secretary sang Department of the Interior and Local Government (DILG) kag Department of Social Welfare and Development (DSWD).
Ginpasalamatan ni Gelangre ang officer-in-charge sang Department of Education- Division of Bacolod City bangud ginsuportahan sini ang patigayunon nga programa para sa mga manunudlo kun sa diin ginpainan sang pondo gikan sa Maintenance and Other Operating Expenses (MOOE) agud nga makakita sila sang maayo nga venue nga makaigo ang 3,800 ka mga manunudlo sa ciudad.
Nagpasalamat man ini sa Local Government Unit (LGU) nga ginsuportahan man sila sa pagpatigayon sang programa agud nga mahatagan man sang pagkilala ang mga manunudlo subong nga World Teachers Day.
