Aminado ang principal sa Bacolod City National High School nga antes paman napagwa ang memorandum sang Department of Education nga nagapahanugot sa mga manunudlo nga magsuksok sang t-shirt sa classroom, ini ang isa ka bulan na nga ginapatuman sa Bacolod City.
Sa interview sang Bombo Radyo Bacolod kay Richard Gelangre, nga amo man ang Presidente sa Bacolod City Public Teacher’s Federation, ang DepEd order ang nagaserbe lamang nga formality sa una na nga division memorandum kun sa diin ginpahanugutan na ang mga School Principal nga makadeklarar sang suspension sa face-to-face classes kun magdangat sa 33 degrees Celsius pasaka ang Heat Index.
Kasunod sini, ginpahanugutan naman ang mga manunudlo kag mga estudyante sa pagsuksok sang komportable nga panaptun.
Paathag ni Gelangre nga sarang gid magsuksok sang teaching uniform ang mga manunudlo kun ila luyag, apang sa DepEd order mahimo na sila nga makasuksok sang alternative uniforms.
Ang mga ini ang ginalakipan sang mga sports uniform kag iban pa nga mga DepEd related t-shirts.
Pinaagi sini, indi matam-an ang mga manunudlo sa tuman nga init dala sang El Niño.
Suno kay Gelangre, ginarekomendar nga polo shirt ang suksukon agud nga mapabilin ang pormalidad sa buluthuan.
Wala naman ginapahanugutan sa mga manunudlo ang mga revealing nga panapton, kaangay sa halos nagapakita na sang cleavage, spaghetti kasubong man shorts.
Sa pihak nga bahin, sarang gihapon makasuksok sang school uniform ang mga estudyante, apang mahimo man nga magsuksok sang mga School provided t-shirt ukon mahimo man puti nga cotton nga t-shirt, samtang magapabilin gihapon ang delargo ukon palda sa idalum.
Gin-athag man sini nga halos kalabanan nga mga eskwelahan sa Bacolod ang nagkasugot sa pagpatuman sang half day nga face-to-face classes.
Maayo suno diri ang derektiba nga ang school head na ang makadeklarar sang cancellation sang klase, apang aminado ini nga sarang ini makatuga sang comparison sa pagpatuman sang iban nga mga eskwelahan.
Bangod sa nakaligad nga anunsyo sang cancellation sa face-to-face classes, paathag ni Gelangre nga madamo sang lalagson sa klase, ilabi na nga sa ikatatlo nga semana sang Mayo, umpisa na sang mga graduation, recognition kag moving up ceremonies
