Nabaton naman sang kalabanan nga mga manunudlo sa syudad sang Bacolod ang ila mga Service Recognition Incentive (SRI) para sa tuigb 2022.
Sa interview sang Bombo Radyo Bacolod kay Richard Gelangre, presidente sang Bacolod Teachers Federation, P15,000 ang kabug-usan nga mabaton sang mga manunudlo kun sa diin ang P9,000 ang ginhatag antes matapos ang tuig 2022 samtang ang nabilin nga P6000 ang ginhatag subong nga bulan sang Enero tuig 2023.
Suno kay Gelangre, indi man bilog nga P15,000 ang ila nga nabaton bangud ginbuhinan man ini sang buwis.
Ginalantaw nga ibuhin ang P1800 nga buwis sa isa ka beses ukon mahimo man nga istaggered agud nga maenjoy man sang mga ini ang SRI.
Nagalaom man ang mga manunudlo nga mahimo nga P20 mil ang ila nabaton nga SRI.
Suno kay Gelangre, nalipay man ang mga ini nga may yara sila sang cash sa bag-ong tuig.
Samtang, nagapanawagan man ini nga makapagwa ang gobyerno sang legislative order para sa dugang nga salary increase ang mga manunudlo kag iban man nga government employees bangud subong nga tuig ang ulihi nga tranche sang salary increase.
