Nagalaom ang principal sang Handumanan Elementary School 2 nga mabalik ang naandan nga school calendar matapos nga madamo sang mga kabataan ang may kabudlayan sa pagbasa.
Sa interview sang Bombo Radyo kay Leo Ceralbo, bag-o pa lamang nagbalik sa normal ang klase matapos ang COVID 19 pandemic, apang sa karun apektado man sa gihapon ang klase bangod naman sa tuman nga kainit.
Suno diri, kasunod naman sini amo ang ginalauman nga tig-ululan nga magatuga naman sang pagbaha kag kanselasyon sang klase.
Ini tanan suno kay Ceralbo ang nagapabudlay sa ila sa paghatag sang dekalidad nga edukasyon.
Nagapati ang school principal nga ang distance learning indi makahatag sang husto nga kaalam sa mga bata kaangay na lamang nga may estudyante nga yara na sa Grade 5 ukon Grade 6 apang indi makahibalo magbasa.
Ginalauman sang principal kasubong man sang mga ginikanan kag manunudlo nga mabalik na ang anay nga school calendar nga nagasanto sa panahon sa Pilipinas kag sa tion sang pagpahuway sang mga kabataan.
