Ginkalipay sang presidente sang Bacolod City Public School Teachers Federation ang madinalag-on nga pagbukas sang klase para sa School Year 2024-2025 kahapon.
Sa interview sang Bombo Radyo Bacolod kay Richard Gelangre, principal sang Bacolod City National High School, dako ang pagpasalamat sini nga nangin manami ang panahon kag natigayon ang ila una nga flag ceremony.
Suno diri, halos excited ang tanan nga mga estudyante kag mga manunudlo apang makit-an man sa iban ang kakulba bangod sa bag-o nga environment para sa ila.
Bangod nga may anxiety nga ginabatyag ang iban nga mga estudyante, may isa ka insidente nga nagluntad kun sa diin nalipong ang isa ka Grade 7 student bangod sa kakulang sang pahuway.
Suno kay Gelangre, ginalauman sini nga mapabilin ang mataas nga enthusiasm sang mga estudyante tubtob nga matapos ang school year.
Ginkakibot man sini nga halos 99 percent sa mga estudyante ang naka-full uniform na.
Apang, samtang nagapatigayon ang flag ceremony kahapon, malawig naman ang pila para sa mga late enrollees.
Pahayag ni Gelangre, posible nga tubtob subong nga adlaw ang enrollment apang kun indi na gid masarangan sang eskwelahan ang pagbaton sang dugang nga estudyante, ila na nga untaton ang enrollment.
