Pabor ang mga manunudlo sa syudad sang Bacolod sa ginpahayag ni Presidente Rodrigo Duterte nga indi pa ini magpasugot nga magbalik ang face-to-face classes tubtob nga indi pa malab-ot sang pungsod ang herd immunity batok sa COVID-19.
Nahibaluan nga ginpahayag ni Duterte nga pahanugutan lamang ang pagbalik sang face to face classes sa tion nga tanan na ang nabakunahan.
Sa interview sang Bombo Radyo Bacolod kay Josenito Makilan, president sang Alliance of Concerned Teachers (ACT) Bacolod, ginpahayag sini nga maayo man nga wala pa ginpasugtan sang presidente nga magbalik ang face-to-face classes bangud indi man sila luyag nga ibutang sa risgo ang mga estudyante apisar nahidlaw man sila nga magtudlo sa face to face.
Ginapasalamatan man ni Makilan ang pahayag sang presidente bangud ginaproteksyunan man sini ang mga kabataan.
Suno pa diri mas ok man nga magpabilin sa modular bisan mabudlay.
Nagpanawagan man ini sa mga pumuluyo kasubong man sa mga estudyante nga magsunod sa minimum health protocols agud mabuligan nga indi na magpadayon ang paglapta sang COVID-19.
Kagab-i, ginpahayag man ni Education Secretary Leonor Briones nga ginaugyunan sini ang presidente kag ginpasalig man sini nga ang ahensya ang magapadayon sa pagpreparar kag maghulat tubtob nga hilway na nga makabukas ang mga eskwelahan.
