Nakahanda na ang mga manunudlo sa syudad sang Bacolod sa pagbalik sang limited face to face classes kadungan sang pagpaidalom sa syudad sa Alert Level 1 sumugod bwas nga adlaw, Martes, Marso 1, 2022.
Sa interview sang Bombo Radyo Bacolod kay Richard Gelangre, president sa Bacolod City Public Schools Teachers Federation, ginakabig sini nga good as normal na ang sitwasyon kag magabalik na ang klase nga face to face.
Suno kay Gelangre ginahulat na lamang nila nga ipatuman ang expanded face to face program.
Nagalaom man ini nga magtayuyon na sa pagnubo ang kaso sang COVID-19 sa syudad sang Bacolod.
Suno diri 95 posyento pasaka na sang mga manunudlo ang nabakunahan batok sa COVID-19.
Ang mga eskwelahan ang nagacomply na lamang sang mga requirements para sa face to face classes.
Ginpahayag man sini nga may mga bagay lamang nga athagon, bangud nakabutang sa guidelines nga kun magbalik na ang full expanded face to face kun sa diin requirement ang anti-gen testing, mangin mabug-at ini para sa eskwelahan.
Suno diri maayo man ini nga balita bangud makilala na sang mga manunudlo ang ila mga estudyante kag makapahuway na sila sa pagprint sang mga modules.
Nagalaom man ini nga mapadayon ang pagnubo sang kaso sang COVID-19 sa Pilipinas kag sa bilog nga kalibutan agud nga makabalik na sa normal nga sitwasyon.
