Nagalaom ang grupo sang mga manunudlo sa ciudad sang Bacolod nga mahinambit ni President Bongbong Marcos sa iya nga State of the Nation Address ang concrete nga plano para sa ila.
Suno kay Richard Gelangre, presidente sang Bacolod City Public School Teachers Federation, salary upgrading ang battlecry sang mga manunudlo gani nagalaom ang mga ini nga mahinambit sang presidente kun ano ang iya plano kun paano mapataasan ang sweldo sang mga manunudlo.
Sang tinalikdan nga tuig suno kay Gelangre, nakabuhi sang tinaga si Marcos nga hatagan sang focus ang edukasyon, pataasan ang sweldo kag iupgrade ang mga classrooms kag mga gadgets.
Subong nga nagsaka ang inflation rate, ginahingyo sang mga manunudlo nga pasakaan man ang entry-level salary.
Sa idalom sang Duterte administration, ginpromisa sang anay presidente nga doblehon ang sweldo sang mga manunudlo apang wala man nagtupa.
Suno kay Gelangre, masobra P30,000 ang poverty threshold nga gintalana sang IBON Foundation kag sa karon, below poverty threshold ang sweldo sang Teacher 1.
Sa karon, halos wala man sang bakasyon ang mga manunudlo bangud magasugod ang klase sa Agusto 29 kag sa Lunes, magasugod na ang National Learners Camp tubtub sa ikatatlo nga semana sang bulan sang Agusto.
Nagabalik man subong ang mga manunudlo agud nga magpreparar sang mga forms.
Suno kay Gelangre, kuntani may isa ka semana nga bakasyon ang mga manunudlo agud nga makarecharge antes ang pagsugod sang klase sa Agusto 29.
Sa idalom sang DepEd Order, voluntary ang pagtambong sa Learners Camp apang may paagi man ang ahensya agud mangin kaangay nga obligado ang mga manunudlo nga magtambong agud indi mahuy-an.
Bangud sa manubo naman nga sweldo, madamo nga mga manunudlo ang nagakaengganyo nga magtrabaho sa luwas sang pungsod bisan lima na ka tuig ang ila eksperyensya sa pagtudlo.
