Wala sang plano nga magsaka sa annex building ukon sa 2nd floor sang Libertad Public Market ang pila ka mga vendor, sa baylo mas luyag sang mga ini nga magbaligya sa gwa sang merkado.
Sa interview sang Bombo Radyo Bacolod kay Ramy Villaflores, fruit vendor sa gwa sang Libertad Public Market, nakaaagi na sila tinir sang kapin isa ka bulan sa ibabaw, apang nagkaladunot lamang ang ila produkto.
Ini bangod tuman ka nubo sang numero sang mga nagasaka nga indibidwal sa baylo, ang mga tawo ang nagabakal sa yara lamang sa gwa kaangay sa bagsakan.
Dugang pa ni Villaflores nga tuman ka gamay ang ginhatag nga pwesto sa ibabaw kag kulang para sa pagdisplay sang ila mga produkto.
Panindugan sini nga mamiyerdihan lamang sila kun magabaligya sa ibabaw, gani panawagan sini sa Bacolod City Government nga pangitaan sang paagi nga magpatok sa mga bumalakal ang 2nd floor sang merkado.
Kaangay sa iya, wala man sang plano nga maghalin sa gwa sang merkado si Nancita Mellegi, nga isa man ka fruit vendor.
Paathag sini nga magluwas tigpiligado, tig-ululan kag wala sang klase, tuman gid ka lakat sang nagasaka sa ibabaw.
Suno diri, indi magakadto sa hulungdon nga lugar ang mga kustomer sa baylo pilion sang mga ini ang baligya sa side walk kag sa bagsakan.
Dugang pa sini nga kun kaisa, may mga manugbakal nga yara lang sa salakyan kag wala na nagagwa kag nagatudlo na lamang sang baklon, nga indi mahimo kun yara sila sa ibabaw.
Panindugan ni Mellegi nga siya ang magapabilin sa side walk, kag kun pahalinon gid man sila, pahayag sini nga dapat patas nga ipatuman sa tanan.
