Iga-block list sa mayor nga mga merkado sa ciudad sang Bacolod ang mga vendors nga wala nakabayad sang ila nga mga arrears.
Sa interview sang Bombo Radyo Bacolod kay Bacolod City Legal Officer Atty. Romeo Carlos Ting Jr., sa meeting sang Local Committee Market Board nadesisyunan nga iblock list na lamang ang mga wala nakabayad sang ila arkabala gani sila ang indi na makapasakop sa ginapatigayon nga mga raffles para sa pwesto sa tatlo ka mayor nga merkado sa ciudad.
Nahibaluan nga sa mga raffles para makapwesto sa Bacolod Central Public Market, Bacolod Libertad Public Market kag Burgos Public Market, may-ara sang mga vendors nga nagareklamo bangod sila ang wala sa masterlist.
Natukiban nga ang mga wala ginlakip sa masterlist sa raffle amo ang mga may nabilin pa nga arrears partikular na sa mga nagaangkon sang dalagko nga pwesto.
Nahibaluan nga nagadalagan sa P1,000 tubtob P2,000 ang iban nga mga pwesto samtang P15 naman kada adlaw ang gamay nga mga tapangko.
Bangod sa may mga vendors nga wala nakabayad sa ciudad sa malawig nga tinuig, iban sa ila ang may arrears nga nagadangat sa P80,000 tubtob P100,000.
Suno kay Atty. Ting, indi patas para sa mga vendors nga responsable sa pagbayad kun parehas lamang nga mahatagan sang tyansa nga makaangkon sang pwesto sa ginrennovate nga mga merkado ang mga wala nagabayad.
Paathag sang City Legal Officer nga mabalik lamang ang mga pangalan nga ginpalos kag liwat nga mapahanugutan nga maka-upod sa raffle para sa pwesto sa merkado kun mabayaran na nila ang ila mga utang.
Sa karun, ginahulat pa nila ang listahan sang mga may nabilin nga arrears gikan sa City Treasurer’s Office kasubong man ang ila nga mga balayran.
Pahanumdom sini sa mga may nabilin pa nga utang nga maintra man ukon indi sa mga raffle, dapat nga bayaran ang utang sa ciudad.
