May-ara sang Libre Sakay nga ginhamtang sa opisina sang Central Negros Electric Cooperative (CENECO) agud masakyan sang mga may transaksyon padulong sa opisina sang Negros Electric and Power Corporation (NEPC).
Sa interview sang Bombo Radyo Bacolod kay NEPC Spokesperson Jonathan Cabrera, duha ka grupo ang nagapadulong sa karun sa ila opisina sa 2nd floor sang Robinsons East, Bacolod City.
Ini ang ginalakipan sang mga pumuluyo nga nakabati sa radyo nga nagbukas na ang ila opisina kag ang isa ka grupo amo ang mga nagapadulong sa CENECO Office kag ginadul-ong sa talatapan sang ila Libre Sakay program.
Paathag ni Cabrera nga indi pa opisyal nga NEPC ang nagamanage sa power distribution facility tubtob nga wala pa natapos ang 15 days publication kag wala pa maka-issue sang Certificate of Public Convenience and Necessity (CPCN) gikan sa Energy Regulatory Commission (ERC).
Sila ang nagbukas na sang opisina sa pagcater sang publiko nga kaangay sang third party contractor agud maseguro nga wala sang pag-untat sang operasyon sa pagpatigayon sang transition.
Sa karun 20 porsyento palang sang capacity sang ila nga macater ang maximum nga nakapadulong sa opisina, gani panugyan nila sa Ceneco employees nga derekta na lamang nga irefer sa NEPC office ang mga nagatransaksyon sa ila.
Ini agud indi na magtalang-talang pa ang mga member-consumers sa kun diin dapat magpadulong para sa ila nga mga concerns.
Ang NEPC office ang nagabukas alas-8:00 sang aga tubtob alas-5:00 sang hapon Lunes tubtob Sabado.
Bukas naman ang ila nga mga hotlines nga mahimo matawagan kun may ara sang mga problema sa linya.
Paathag ni Cabrera nga ini ang ila ginbuksan agud makabulig sa Ceneco kag maseguro ang mas madasig nga pagresponder sa mga brownout.
Kun indi naman makasulod sa mga hotline numbers sa tion nga may ginacater pa nga iban nga tawag, mahimo man nga magmessage sa ila social media site.
