Ginhatagan sang cash incentives ang mga atleta sang Bacolod City nga nagpartisipar sa Palarong Pambansa 2026 kasubong man ang ila coaches, assistant coaches, chaperone, kag trainors.
Sa pahayag ni Bacolod City Mayor Greg Gasataya kadungan sa 88th Charter Day celebration sa SM City Bacolod, ginpahayag sini nga may 12 ka gold medalist, 11 ka silver medalist, kag 18 ka bronze medalist.
Ang kada gold medalist ang makabatun sang P18,000 kalakip na ang kada player sang mga group games; P15,000 naman sa silver medalist; kag P12,000 naman sa bronze medalist.
Parehas man ang mabatun nga kantidad sang mga coaches, depende sa medalya nga makuha sang ila nga atleta.
Ang mga assistant coaches ang makabatun naman sang P15,000 sa kada gold medalist, P12,000 sa silver medalist, kag P8,000 sa bronze medalist.
Ang Trainor kag Chaperone ang parehas naman nga magabatun sang P10,000 sa gold medalist, P8,000 sa silver medalist, kag P5,000 sa bronze medalist nga mga gina-asikaso nga atleta.
Bisan ang mga atleta nga wala nakapauli sang medalya ang magabatun man sang P1,000.
Isa sa gindayaw ni Mayor Greg si Sofia Ysabela Secuelan nga nakakuha sang tatlo ka gold medal sa swimming elementary division ukon P54,000.
Pahayag naman sang alkalde nga may medalya man ukon wala, ang ciudad ang proud na sa tanan nga atleta nga nagpartisipar para sa rehiyon.
Pasalig man sini nga magapadayun ang suporta sang ciudad sa mga Bacolodnon athlete.
