Nagpanindugan ang isa man ka miyembro sang Amlig Tubig nga dapat atubangon sang miyembro sang Board of Directors sang Bacolod City Water District (BACIWA) ang mga nagpatigayon sang rally sa atubang sang balay sini.
Ini ang kasunod sang rally nga ginpatigayon sang Amlig Tubig kag mga empleyado sang BACIWA nga illegal nga ginterminate sang tinalikdan nga tuig sa atubang sang balay ni BOD member Mona Dia Jardin.
Suno kay Wennie Sancho, kinamatarong sang mga empleyado nga magtukod sang grupo kaangay sang union kag kinamatarong man nila nga magrally agud nga ipakigbato ang ila mga kinamatarong.
Suno diri, ang mga senador kag iban pa nga national officials ang ginarallyhan man mismo sa atubang sang ila balay kag wala man nagareact.
Ginpahayag man ni Sancho nga dapat atubangon ini ni Jardin bangud public official siya kag isa man siya man siya sa nagpirma sa ginfile nga redundancy sang mga empleyado sang prime water.
Indi man mabasol suno kay Sancho ang mga empleyado ilabi na ang mga miyembro sang Union nga magsipukar ang mga balatyagon bangud labor rights nila ini kag ginlapas man ang ila nga security of tenure sang BACIWA.
Suno kay Sancho, wala man ginrespeto sang water district ang security of tenure kag collective negotiations, provisions kag kaangay nga butang.
Suno diri, indi dapat magpangakig si Jardin bangud kaupod ini sa trabaho kag risgo bilang isa ka public opisyal.
Ginalaragway man ni Sancho nga ang nagakatabo daw kaangay na sang karma nga kun ano ang ginhimo magabalik man sa imo.
Ginpahayag man sini nga ang tubig ang isa sa nagapanguna nga kinahanglanon sang mga tawo apang subong nga panahon nangin commodity.
Suno kay Sancho, dapat iaddress sang mga board of directors ang problema sa tubig agud ipakita nga indi sila iresponsable nga mga lideres.
