Nagsapol na ang katapo sang Negros Association of Chief Executives (ACE), Inc. agud nga makakuha sang endorsement para kay Liga ng mga Barangay sa Pilipinas President – Negros Occidental Provincial Chapter, Richard Julius Sablan sang Victorias City para sa pagpapili sini bilang regional president sang Liga ng mga Barangay sa Western Visayas.
Suno kay Victorias City Mayor Javi Benitez, nagpatigayon sila sang meeting para sa endorsement ni Sablan.
Suno kay Benitez, ang Negros ACE ang naghatag man sang bug-os nga suporta sa tion nga magagikan sa probinsya sang Negros Occidental ang mangin regional president sang Liga ng mga Barangay sa Pilipinas.
Ginpahayag man sini nga nagatrabaho na ang Negros ACE kag ang Provincial Liga ng mga Barangay kag naestoryahan na ang pagpapili nga presidente sa regional level kag ginalantaw man sini nga kinahanglan nga may suporta nagikan sa mga Local Government Units ukon pagduso nagikan sa alkalde kag mga barangay officials.
Aminado man ini nga excited na siya sa pagpapili ni Sablan kag bangud sini magapadulong man siya kag ang presidente sang Liga ng mga Barangay sa Pilipinas – Negros Occidental Provincial Chapter sa mga probinsya sa Western Visayas.
Suno kay Benitez apisar nga indi kabahin ang Cebu sa voting body para sa election sang Liga ng mga Barangay sa Pilipinas sa Western Visayas, magabisita sila didto bangud may yara sila sang nabaton nga imbetasyon ni Mayor Mike Rama kag nakaestoryahanay naman sila sang gobernador sang Aklan kag magabisita sa probinsya sang Guimaras.
Samtang, ginkumpirmar sang presidente sang sLiga ng mga Barangay sa Pilipinas-Negros Occidental Provincial Chapter nga magatabok sila sa Iloilo para sa regional election.
Suno kay Barangay 2 Punong Barangay Richard Julius Sablan sa ciudad sang Victorias, ini ang una nga may nagikan sa probinsya sang Negros Occidental nga nagpapili para sa regional election para sa liga ng mga Barangay sa Western Visayas.
Suno kay Sablan, ginabanta nga sa madason nga bulan patigayunon ang nasambit nga piniliay.
