Wala ginadula sang Isabela Municipal Police Station nga mga miyembro sang New People’s Army ang nagpatay kay Punong Barangay Danilo Dautil sang Barangay Cabcab kahapon sang hapon.
Suno sa hepe sang Isabela Municipal Police Station nga si Police Capt. Joseph Partidas, si Dautil ang may igo sang bala sa ulo kag natuo nga bahin sang dughan.
Nakuhaan naman sang pellets sa dughan ni Dautil gani ginapatihan nga mahimo home-made ukon improvised shotgun ang gingamit sang suspetsado.
Isa sa ginalantaw sang mga pulis nga mahimo NPA ang nagpatay kay Dautil bangud nagwithdraw sang suporta ang barangay official sa rebelde nga grupo sang ginlunsyar ang National Task Force to End Local Communist Armed Conflict sang tuig 2018.
Si Punong Barangay Roy Pagapang ang ginpatay man malapit sa crime scene sang tuig 2018.
Suno sa hepe, isa ang pagpangawat sa mga motibo nga ginalantaw sa krimen bangud wala na ang bag sang barangay official, apang ginahibalo pa kun may kwarta ini nga dala kahapon sang hapon.
Suno sa pamilya, may bag nga dala si Dautil apang sa pagpangusisa sang mga pulis, wala na ang iya nga bag kundi kalo, shades kag motorsiklo lang ang nabilin.
Wala man sang pagpamahog nga nabaton ang punong barangay bangud wala man ini sang cellphone kag hipuson ini nga sahi sang tawo.
Ginalantaw naman sang mga pulis nga indi magnubo sa duha ang mga suspetsado nga nagpatay sa punong barangay.
