Gin-abusaran ang pila ka mga monitoring equipment sa Manghumay Monitoring Station ukon VKMH sang Philippine Institute of Volcanology and Seismology – Negros Island Region (PHIVOLCS-NIR) sa Sitio Manghumay, Brgy Mailum, Bago City kahapon.
Sa interview sang Bombo Radyo Bacolod kay PHIVOLCS-NIR Project Technical Aide VI Ruth Asentista, ang ila monitoring facility ang unmanned ukon wala sang tawo nga nagabantay.
Kahapon, hinali nga nadula ang ila connection sa radyo sa nasambit nga station gani ginpadulungan ini sang routine maintenance team, kag didto na nadiskubrehan nga ginpang-utod ang mga kuryente kag iban nga parts sang mga monitoring quipment.
May fence man ang monitoring facility, apang ini ang manubo lamang kag sarang gid nga masulod kun hungdon.
Ginpablotter na nila ang hitabo, apang wala pa sila sang lead, luwas sa kaseguraduhan nga ginhungod ang pagpang-abusar basi sa paagi sang pag-utod sang mga cables.
Kalakip sa mga nadamage ang Scanning Differential Optical Absorption Spectroscopy (ScanDOAS) nga nagameasure sang Sulfur Dioxide (SO₂), GPS para sa monitoring sang ground deformation, seismic sensor para pagmonitor sang mga linog, kag authomatic system weather station para sa pagmonitor sang rainfall.
Gilayon man nga ginrepair ang mga naguba, kag nabalik na sa normal function subong nga adlaw.// Ini ang una nga kahigayunan nga may nang-abusar sa VKMH.
Suno kay Asentista, gikan sa monitoring station, ang data ang nagaderetso sa Kanlaon Volcano Observatory sa La Carlota City.
Ang monitoring station ang ginapadulungan lamang para sa duha ka beses sa kada bulan nga preventive maintenance kag kun may mga problema nga kinahanglan sang repairs.












