Indi malabayan kahapon sang udto ang atubang sang Gaisano Grand Mall sa Dalan Araneta, Barangay Singcang Airport kasunod sang pagsaka sang tubig baha dala sang wala untat nga pag-ulan halin kahapin sang kaagahon.
Gindala naman sa mas mataas nga lugar ang mga residente kag pila ka mga baboy bangud ginbaha man ang Purok Mars, Barangay Singcang Airport.
Bangud sa kataason sang tubig baha, gindala sa Purok Mars ang rescue boat sang Bureau of Fire Protection agud nga marescue ang mga pumuluyo.
Suno sa pila ka personnel sang Bacolod City Fire Station, nagdala sila sang rescue boat sa sulod agud nga madala ang mga pumuluyo sa mas hilway nga lugar.
Nagbalibad naman ang iban nga residente nga mag-upod bangud naanad na ang mga ini nga nagabaha sa lugar.
Nadiparahan man sini nga amat-amat na ang pagsubside sang tubig apang ginbantayan ang level sang tubig bangud high tide alas-3:00 sa hapon.
Suno diri, nagafunction ang drainage system apang bangud sa kadamulon kag wala untat nga ulan, ini ang nagsupot kag nagbaha.
