Nangin malaba ang pila sang mga salakyan sa mga fuel station kahapon bangod sa paghingagaw sang mga pumuluyo nga makapatughong sang madamo ilabi na nga ipatuman na subong nga adlaw ang bigtime price hike sa produktong petrolyo.
Nahibaluan nga nagadangat sa P5.40 tubtob P5.50 ang mangin pagsaka sa kada litro sang diesel samtang ang gasolina naman ang magasaka sang P3.40 tubtob P3.50 ang kada litro.
Bangod sini, iban sa mga nagapatughong sang gatong ang nagadala na sang mga gallon nga masudlan sang mas barato pa nga krudo kag gasolina.
Suno kay Boy Delgado, residente sa Talisay City kag isa sa motorista nga naghingagaw sa pagpatughong sang iya nga salakyan, ipa-full tank na sini ang iya nga salakyan bangod natabuan man nga siya ang may padulongan subong nga adlaw sa Hinobaan.
Paathag sini nga bangod sa tuman nga pagmahal sang krudo kag gasolina gani magatipon na ini samtang barato pa agud nga indi matam-an.
Sa masobra P5 nga saka sa presyo sang krudo, aminado ini nga manig-a na sa kasakit ang mga motorista.
Si Delgado kag ang iya asawa ang lunsay retirado na kag nagasalig nalang sa karun sa pension gani mabug-at para sa mga ini ang tuman nga pagtaas sa presyo sang gatong.
Samtang pahayag naman ni Rey Dacutao nga sa 20 ka tuig sini nga pagbyahe sang taxi, karun lang ini naka-eksperyensya nga nagadangat sa P5 ang pagsaka sa presyo sang gatong.
Suno diri yara lang sa P300 ang sarang sini nga malimpyo gikan sa bilog nga adlaw nga pagbyahe nga ginasaligan naman sang iya nga pamilya.
Si Dacutao ang may-ara sang lima ka mga kabataan.
Ginakasubo man sini ang tuman nga pagsaka sang presyo sang gatong, apang aminado ang motorista nga wala na sila sang mahimo kundi mag-agwanta nalang.
