BACOLOD CITY — Naga-ihaw sang kanding kag baka ang mga Muslim subong nga adlaw kadungan sang Feast of Sacrifice ukon Eid’l Adha nga gindeklarar sang Malakanyang nga isa ka holiday.
Sa interview sang Bombo Radyo Bacolod, ginpahayag ni Abraham Idjirani, spokesperson sang Sultanate of Sulu, nga importante ang Eid’l Adha bangud subong nga adlaw, nagkadto ang mga pilgrims sa bukid sa Mina, Saudi Arabia kun sa diin ginapatihan nga natabo ang Feast of Sacrifice sang Propeta nga si Abraham sa iya anak nga si Ismael sa ikaduha sini nga misis.
Nahibaluan nga sang amo nga tion, ginpakita ni Abraham ang pagsunod sa Diyos apang bangud wala ini nagpadaog sa yawa, karnero nalang ang ginpahalad sa iya sa baylo nga si Ismael.
Subong nga adlaw suno kay Idjirani, naga-ihaw sila sang kanding kag baka bilang pag-ilog sang ginhimo ni Abraham.
Ang lutuon nga mga sapat suno kay Idjirani ang ipakaon man sa mga pumuluyo.
Diri sa ciudad sang Bacolod, ginalauman ang pagtililipon subong nga adlaw sang indi magnubo 300 ka mga Muslim sa Dar Al Dhikr Islamic Center sa Barangay Mansilingan.
Suno kay Imam Omar Betita, may pangamuyo nga hiwaton alas 6:30 subong sa aga kag pagkatapos sini, ila nga saluhan ang mga sapat nga ginhalad kaangay sang baka, kanding kag karnero.
Nagpanawagan man ini sa mga Muslim brothers and sisters nga bukas ang Dar Al Dhikr sa pagbaton sa mga luyag magkadto.
