Temprano pa nagtipon ang mga Muslim sa ciudad sang Bacolod agud saulugon ang Eid Al Adha ukon Feast of Sacrifice subong nga adlaw nga gindeklarar ni President Ferdinand ‘Bongbong’ Marcos nga isa ka regular holiday.
Sa interview sang Bombo Radyo kay Sultan Abdul Gaffar Palagawan, presidente sang Muslim for Peace and Unity Development, ang Eid Al Adha ang ikaduha sa pinakadako nga holidays nga ginselebrar sang Islam.
Sa sini nga adlaw, ginakilala ang willingness ni Ibrahim nga isakripisyo ang iya anak nga si Ismail bilang pagpakita sang kahandaan nga magpati sa sugo ni Allah.
Alas-6:00 kaina sang aga, nagtipon ang mga Muslim sa Capitol Lagoon and Park agud magpangamuyo.
Magluwas sa Lagoon, may yara man sang mga nagtipon sa grounds sang Bacolod City Government Center kag sa Barangay Alijis.
Sa ila nga pagtipon, ang mga Muslim ang nangamuyo kag nangayo sang patawad kay Allah.
Naghatag man sang sermon ang Imam pagkatapos sang pangamuyo kag ginsundan sang paghalok, paghakos kag pagpatawad sang mga Muslim sa isa kag isa.
Pagpauli sa ila tagsa ka mga balay, nag-ihaw ang mga Muslim sang sapat nga patimaan sang ginhimo ni Ibrahim.
Nagpanawagan naman si Palagawan sa kaangay nga Muslim nga ipabilin ang kaayo kag paghatag sang importansya sa kalinong.
