Nagtipon ang mga Musilim sa Bacolod City Government Center grounds kaina sang aga para sa congregational prayer sa selebrasyon sang Eid al-Adha ukon Feast of Sacrifice.
Yara sa BCGC ang Balik Islam religion samtang yara naman sa Capitol Lagoon ang Maranao religion, ang duha ka relihiyon ang ginkabig nga nagapanguna nga relihiyon sang Muslim sa Pilipinas.
Alas 7:30 kaina sang aga natapos ang congregational prayer kag sila ang nagpadulong sa moske sa Barangay 31, Bacolod City.
Nag-ihaw man sang kanding, baka, ukon karnero.
Sa interview sang Bombo Radyo kay Idres Negroprado, propagator sang Muslim, iya ginpasalamatan nga natapos na ang pandemic kag wala na sang social distancing.
Suno diri, mahimo na nila mahakos ang ila mga kauturan nga mga lalaki, makatipon-tipon kag makahampang ang mga kabataan.
Masobra 500 sila nga mga Muslim nga nagtipon-tipon sa BCGC grounds nga suno kay Negroprado, ang ila pagtipon-tipon agud mapalapta ang kasadyahan kag katawhay sa ila mga utod nga Muslim kag sa iban nga relihiyon nga sila ang makapahibalo sang ila selebrasyon.
Samtang, nakigbahin man kaina sa Bacolod City Government Center ang 28 ka mga police trainee sa ciudad nga mga tumandok sang Tawi-tawi Province sa Bangsamoro Autonomous Region in Muslim Mindanao.
Sa interview sang Bombo Radyo kay Patrolman Caidic Isirani, kada Biyernes nagapadulong ini kag ang iya mga abyan nga Muslim sa moske kag didto nila nakilala ang mga Muslim nga nagapuyo diri sa ciudad.
Iban sa mga abyan sini nga Muslim nga police may yara sang pamilya sa Bacolod City.
Suno diri, wala sang barrier sa ila nga trabaho bilang pulis kag sa ila relihiyon.
Dugang pa niya, wala sang nagapatunga sa ila trabaho bilang pulis kag magpadayon lang sa kun ano man ang ginapatihan ukon ginatuohan nga relihiyon.
