Nangin masako ang mga residente sang Purok Mars, Barangay Singcang Airport Bacolod City sa pagpaninlo matapos ang pagbaha nga tuga sang pag-ulan dala sang Bagyo Verbena kahapon sa ciudad sang Bacolod.
Sa interview sang Bombo Radyo Bacolod kay Anthony Tejada, Purok Chairman sang Purok Mars, may yara sang 200 ka mga pamalay nga naapektuhan kag iban diri ang nawas-ag gid.
Suno kay Tejada, kabudlay maghulag bangud wala sang kuryente kag tubig.
Suno diri ini man ang ikaduha nga tion nga naeksperyensyahan sini ang kaangay nga pagbaha sa sulod sang 30 ka tuig.
Nagdangat sa 900 ka indibidwal ang naapektuhan sang pagbaha.
Ginpasalamatan sini ang bulig nga ginpadala ni Bacolod City Mayor Greg Gasataya, Congressman Albee Benitez kag sang mga private sectors.
