Madutay lang ang nabaton nga bulig sang iban sa mga residente sang ciudad sang Bogo, Cebu, halin sa gobyerno samtang ang iban naman nagdesisyon na nga magsaka sa bukid bangod sa sige-sige nga paglinog.
Sa interview sang Bombo Radyo Bacolod kay Noel Inosanto, Negrense nga sa karun nagapuyo na sa Bogo City, Cebu, sa ila area kagab-i lang sila nahatagan sang noodles, canned sardines kag biscuits apang wala sang bugas kag tubig ilimnon nga kinlanlan gid nila kuntani bangod may kakulangan na sang tubig sa lugar.
Suno diri, wala man nagpabaya ang alkalde sang ciudad apang mas prayoridad nga hatagan sang food packs kag cash assistance ang mga area nga tuman nga nahalitan.
Pahayag ni Inosanto, kagab-i may duha ka linog nga nabtyagan alas-6:21 kag alas- 6:28 amo nga nagatinir na lamang ang mga pumuluyo sa gwa sang ila balay.
Iban sa ila nagsaka na sa bukid para sa ila safety samtang sila nagdesisyon naman nga magsunod didto sa babaw.
Suno kay Inosanto, halos nagakatrauma na ang mga tawo didto nga sa tion sang linog, nagahibi ang mga kabataan kag bisan mahinay lang ang pag-uyog sang duta, tuman na ang kakulba sang mga tawo.
Nagapanawagan ini sa karun nga mahatagan sila sang tubig kag canned goods kag nagapangabay nga kun tani tanan nga biktima sang linog mahimo nga mahatagan sang bulig.
