Ginpanindugan sang hepe sang Silay City Police Station nga courier sang illegal nga druga sanday Razel Gamazan kag Lennie Nava kag nakahibalo ang mga ini nga shabu ang ginpadala sa ila sang ila boss nga nabase sa Metro Manila.
Suno kay Police Lt. Col. Mark Anthony Darroca, alegasyon lang nanday Gamazan kag Nava nga sila ang ginbutangan sang piring sang mga lalaki nga indi nila kilala bangud mahimo gid sila nga makasinggit bangud madamo ang tawo sa barko.
Suno sa hepe, yara sa cellphone sang duha ang instruction sang ila boss kun sa diin sila makadto.
Ang impormasyon angot sa transaksyon ang nadawat sang Regional Drug Enforcement Unit 6 nga nagpahibalo sa Silay City Police Station bangud taga-Silay ang kadtuan sang duha.
Navalidate sang Silay City Police Station nga ang persona nga kadtuan nanday Gamazan kag Nava ang yara sa drug watchlist sang police station.
Napatigayon ang buybust sa waiting shed malapit sa entrance pasulod sa Barangay Guinhalaran, Silay City antes ang tungang gab-i kun sa diin ila gindaho ang druga sa asset sang Silay City Police Station.
Antes ang buybust, nagpanaog ang duha sa green nga sedan apang wala naabutan sang mga pulis nga nagpadulong ini sa norte.
Indi pa man matumod kun halin mismo sa BREDCO Port ang duha kag nagdiretso sa Silay.
Antes naconsummate ang buybust operation, katatlo ginkambyo ang lugar nga tabuan nga ginalakipan sang plaza alas-7:00 sang gab-i, ginsaylo sa crossing pa-airport tubtub nafinalize nga matabuay sa Brgy. Guinhalaran antes ang tungang gab-i.
Suno kay Darroca, ang tag-5 grams nga sachet ang yara sa bag nanday Gamazan kag Nava samtang ang pito ka tag-100 grams ang nasulod sa foil sang gatas kag ginsulod sa box.
