Ginklaro sang pinuno sang Department of Social Services and Development (DSSD) – Bacolod nga wala sang may ginakakas nga pangalan sa masterlist sang mga hatagan sang ayuda may kaangtanan sa mga nahalitan sang Bagyo TINO.
Sa interview sang Bombo Radyo Bacolod kay DSSD Head Dr Ritchelle Verdeprado Mangga, sila ang nakarelease na sang balor P73,283,123 para sa 11,121 ka benepisyaryo, wala pa nadala ang subong nga adlaw.
Sa karun, may anom pa lamang nga derekta nga nagreklamo sa ila, samtang ang iban ang nagapautwas sa social media bangod sa gina-alegar pagkadula sang ila pangalan sa listahan.
Ini matapos nga ginpost sang pila ka mga Barangay ang listahan sang mga makabatun sang ayuda.
Suno kay Mangga, ang iban nga pangalan ang indi madala sa masterlist bangod ini ang ginapaidalom pa sa validation.
Partikular na ang may duplication kag bisan ang may kaparehas ukon magka-anggid nga pangalan.
Wala man nagakadala sa listahan ang mga nakitaan sang discrepancy sa ginbutang nga data kaangay sang sala nga petsa sang date of birth.
Apang pasalig ni Mangga nga sila ang malakip gihapon kun maverify na, kag tinguhaan nila nga madala sa 2nd batch sang distribusyon apisar nga ini kuntani ang para na sa mga slightly damaged ang balay.
Paathag sini nga ang Barangay ang nagasumiter sang mga listahan sa DSSD, sila ang nagapatigayon sang verification kag ini ang ginasumiter naman sa Department of Social Welfare and Development (DSWD) nga nagapatigayon pagid sang revalidation antes irelease ang budget paagi sa Emergency Cash Transfer Program.
Tinguhaan man nila nga matapos ang tanan nga payout antes matapos ang tuig.
Sa mga may reklamo, panugyan ni Mangga nga magkadto lamang sa DSSD Office sa Bacolod City Government Center ukon magdangop sa ila grievance desk nga ginahamtang sa nga payout centers.
