Nagpalauli na ang kalabanan sa mga evacuees bangod sa mga pagbaha sa ciudad sang Bacolod.
Sa interview sang Bombo Radyo Bacolod kay Earl Edward Ramirez, operations chief sang Bacolod City Disaster Risk Reduction and Management Office, nagdangat sa 171 ka pamilya ukon kapin 500 nga indibidwal ang nag-evacuate bangod sa baha nga gintuga sang Bagyo OPONG.
Sa ila assessment, ginpahayag ni Ramirez nga indi tuman ka damo ang mga ginbaha nga lugar.
Ang may madamo lamang nga evacuees amo ang Barangay Pahanocoy, kun sa diin ang mga evacuees ang nagtinir sa MG Medalla Integrated School kag sa Barangay Banago kun sa diin ang mga evacuees ang nagtinir naman sa Domingo Lacson National High School.
Samtang duha ka pamilya ukon walo ka indibidwal naman ang nag-evacuate sa sa community center sang Barangay Taculing; isa ka persons with disability (PWD) kag isa ka senior citizen sa Barangay 10 nga nagtinir sa Barangay Hall; kag duha ka senior citizen sa Barangay Cabug nga nagtinir sa ila Barangay Health Center.
Luwas sa mga nagtinir sa evacuation centers kag baranay facilities, may-ara sang 2,500 nga apektado apang wala na nag-evacuate pa bangod indi man tuman ka lala ang risgo sang pagbaha.
Nagapati si Ramirez nga dako ang nabulig sang mga declogging kag desilting operations gani dyutay nalang ang lugar nga ginbaha.
Sila ang magapatigayon naman sang assessment agud matumod kun ano gid ang mga rasun nga nagresulta sa pagbaha kag magahimo sang rekomendasyon agud malikawan ang kaangay nga insidente.
