Nagdangat sa 301 ka pamilya ang gin-evacuate sa nagluntad nga pagbaha sa Northern Bacolod.
Sa datos gikan sa Depatment of Social Services and Development, 11 ka pamilya ang nag-evacuate gikan sa Barangay 8, 106 ka pamilya sa Barangay Banago, 54 ka pamilya sa Barangay 17, 72 ka pamilya sa Barangay bata, 10 ka pamilya sa Barangay Villamonte, walo ka pamilya sa Barangay 10, kag 40 ka pamilya sa Barangay 3, Bacolod City.
Sa interview sang Bombo Radyo Bacolod kay Earl Edward Ramirez, chief operations officer sang Bacolod City Disaster Risk Reduction and Management Office, ang Barangay Bata kag Barangay Banago, nga kilala na nga flood prone areas ang pinakadako nga nahalitan.
Suno diri, nag-umpisa alas-10:00 sang gab-i ang ulan apang pagdangat sa alas-11:00 kun sa diin may ara sang heavy rainfall warning, nag-umpisa man ang pagbubo sang mabaskog nga ulan nga nagsegisegi tubtob na sa alas-3:00 sang kaagahon.
Sa ila assessment, ang ginbubo nga ulan ang katumbas na sa 3-weeks worth of rain.
Ginpasalamatan man nila ang tanan nga nagbulig nga rescue groups kaangay sa Philippine National Police, Philippine Coast Guard, Bureau of Fire Protection, Philippine Red Cross, Negros Tigers, Chamber, Amity kag iban pa.
Ginapakamaayo man ni Ramirez nga wala sang napatay kag malala nga napilasan.
Dako man nga butang nga madamo ang temprano pa nga nag-evacuate.
Pahanumdom sini sa mga pumuluyo nga sa kaangay nga sitwasyon, mas maayo nga mag-evacuate na samtang indi pa tuman ka taas ang baha, bangod bisan ang mga rescuers ang mahimo makaangkon sang kabudlayan sa pagsulod sa pila ka mga lugar.
