Nagpilo ang kadamuon sang mga pumuluyo nga nagabakal subong sang paracetamol bangud man sa kadamuon sang ginatrangkaso.
Sa interview sang Bombo Radyo kay Jovelyn Blancaflor, national president sang Drugstores Association of the Philippines, ang isa ka branch sang iya nga botika ang makapaubos sang masobra napulo ka box sang paracetamol sa isa ka adlaw ukon katumbas sang masobra 5, 000 ka tabletas.
Bangud halos tanan nga households subong ang nagabatyag sang trangkaso, ang kada kustomer ang nagabakal man sang paracetamol.
Nagpahayag naman ang opisyal sang isa ka brand nga nagdugang na sila sang tawo sa laboratoryo apang ginalagas gihapon ang stock sang bulong bangud sa pagsaka sang demand.
Ginalantaw suno kay Blancaflor nga nagdamo ang ginatrangkaso bangud sa panahon nga matugnaw kun kaagahon kag tuman naman kainit kun adlaw.
Bangud nagdamo naman ang nagapabakuna, nagakinahanglan man ang mga ini sang paracetamol sa tion nga magbatyag sang side effects kaangay sang flu-like symptoms.
Sa pihak sini, wala naman nagakaubusan sang supply sang paracetamol sa mga botika bangud may yara sang alternative kun wala ang preferred brand. Samtang, naintindihan na sang publiko ang policy sang mga drugstores nga ginalimit lang ang kadamuon sang paracetamol nga ginabaligya sa kada kustomer bangud sa kadamuon ang nagakinahanglan.
Sa interview sang Bombo Radyo kay Jovelyn Blancaflor, national president sang Drugstores Association of the Philippines, nagmandu ang Department of Health kag ang Department of Trade and Industry nga 20 lang ka tabletas ang maximum nga mabakal sang isa ka kustomer ukon 60 kada household.
Apang bangud sa kadamuon sang nagabakal depende sa location suno kay Blancaflor, 10 nalang ka tabletas ang ginahatag sa isa ka kustomer.
Wala naman sang nagareklamo angot diri kadungan sang pagpaathag sa ila angot sa policy kag panugyan nga mabalik lang pagkasunod nga adlaw kun kulang.
Suno kay Blancaflor, nasolbar na ang problema sa panic buying apang madamo gid sang nagabatyag sang trangkaso sa karon gani nagsaka ang demand.
Ang bentaha lang sa karon bangud ang mga fully vaccinated individuals ang madali lang mag-ayo sa trangkaso.
Ginpasiguro naman sang mga pharmaceutical companies nga may bastante nga supply sang paracetamol kun sa diin may replenishment nga nagaabot kada 15 ka adlaw.
