Aminado ang sales clerk sa baligyaan sang school supplies sa Bacolod Central Market nga may gamay nga pagnubo sa bumalakal.
Madumduman nga nagpanghatag sang school supplies ang Bacolod City Government sa Kinder tubtob High School sa tanan nga public schools para sa subong nga School Year 2026-2027.
Sa interview sang Bombo Radyo Bacolod kay Lucet Tibus, sales clerk sa Charlie Trading School and Office Supplies sa Gonzaga Street sa Bacolod Central Market, wala sang pagbag-o sa presyo sang ila nga school supplies.
Apisar nga sarang gihapon nga makabakal sang notebooks sa balor nga P13 sa spiral kag P15 nga natahi sang yarn, kalabanan sang ila baligya ang naka-set na sa tig-10 ka bilog.
Ang 10 pcs sang spiral notebook ang mabakal sa balor nga P125, parehas sa writing notebook, samtang P135 naman ang naka-yarn.
Apang wala na sang isa ka notebook nga paaman sa pagbakal sang set, indi kaangay sang tinalikdan nga tuig.
Ang box sang isa ka dosena nga ballpen ang nagabalor sang P66, samtang ang isa ka box sang monggol pencil ang balor P90 apang P10 kun isa lamang ang baklon.
Ginapakamaayo naman ni Tibus nga antes magpanghatag sang school supplies ang ciudad, may non-government organization (NGOs) na nga nangumpra, nga mahimo ipanghatag man sa mga estudyante.
Pahayag sini nga indi gid man tuman ka dako ang epekto, bangod madamo paman sang mga nagabakal nga gikan sa private schools ukon mga gikan sa iban nga banwa kag ciudad.
Dugang pa sini nga mahimo magabakal naman sa masunod ang mga ginikanan kun maubos na gamit ang mga ginhatag sang ciudad.
