Nalakip na sa biktima sang dengue sa Barangay Taculing, Bacolod City ang nagabusong kag ang senior citizen.
Sa interview sang Bombo Radyo kay Punong Barangay Lady Gles Gonzales Pallen, gin-activate na sang barangay ang ila nga task force kontra dengue.
Kada weekends, nagapatigayon ang brgy sang search and destroy operation paagi sa fogging kag pagpamutang sang insecticide.
Suno diri, humalin sang Enero tubtob sa karun, nagsaka ang kaso sang dengue sa ila lugar amo nga wala man sila untat sa pagpalapta sang impormasyon sa mga pumuluyo kun ano ang dapat nga himuon.
Pahayag ni Pallen, kalabanan sa biktima sang dengue ang naga-edad sang 15 anyos panaog, kag nakaligad lamang may yara sang nagabusong nga nagpositibo sa dengue kag may yara pa sang naga-edad sang 71 anyos.
Samtang, sa karun nagdangat na sa 1,177 ang kaso sang dengue sa probinsya sang Negros Occidental.
