Nagpahanumdom ang tagpamaba sa Police Regional Office (PRO) 6 sa luyag magbyahe balik sa Western Visayas nga likawan ang paggamit sang peke nga RT-PCR test result bangod sarang mapriso ang madakpan nga nagagamit sini.
Nahibaluan nga nagpaandam na si Philippine National Police (PNP) Chief Gen. Guillermo Eleazar batok sa mga pagpeke sang swab test result sang mga travelers.
Suno kay P/Lt Col. Arnel Solis, dapat nga hibaluon na nga daan sang mga magapauli sa Western Visayas ang mga requirements nga ginapangayo sang ila padulongan nga local government unit (LGU) agud indi na mabudlayan sa pagbyahe.
Ginapanugyan man sini bisan sa mga pumuluyo sa Western Visayas nga may himata ukon kilala nga luyag nga magpauli, nga magbulig man ang mga ini sa pagpahanumdom.
Paathag ni Solis nga may mga LGU nga nagarequire sang negatibo nga RT-PCR test result kag iban pa nga mga dokumento.
Paandam sini nga indi gid magpati sa mga nagatugyan nga magbayad lang kag matagaan na gilayon sang negatibo nga RT-PCR test apisar nga wala nagpadulong sa testing center para kuhaan sang specimen sample.
Suno kay Solis, ang kaangay nga offer ang sigurado nga peke, kag mahimo naman nga mapriso ang madakop nga magagamit sini.
Ginpakigbahin sang PRO 6 spokesperson nag may security features sa orihinal nga swab test result nga nagikan sa mga otorisado nga ospital ukon swab testing centers.
May nagakaigo man nga proseso sa pagrelease sang mga resulta sang swab testing suno kay Solis.
Dugang pa ni Solis nga mahimo man nga matsekyar sang mga LGU online, kun matuod nga napaidalum gid man sa swab testing ang mga travelers pinaagi sa pagtsekyar sa ila nga RT-PCR test result.
Dugang pa sini nga mahimo barato pa kun sa ospital ang mga ini magapakuha sang test bangod natukiban nga isa ka peke nga RT-PCR test result sa Quezon City ang nagabalor P16,000.
May pila naman nga nagkaladakpan sadto nga turista sa Boracay Island nga naggamit sang peke nga swab test result.
Kun madakop sa paggamit sang peke nga RT-PCR test, mahimo ang mga ini magpangatubang sang kaso sa paglapas sang Republic Act 11332 ukon Law on Reporting of Communicable Diseases.
Magluwas sa nagagamit, ang naghimo sang peke nga RT-PCR test ang magapangatubang man sang kaso.
