Ginakasubo sang konsehal kag abogado sa ciudad sang Bacolod nga sa masami ang nagakaconvict lamang sa corruption amo ang mga opisyal sang gobyerno nga ginagmay lamang ang balor nga ginkawat samtang nagaka-acquit ang mga nagapangawat sang minilyon.
Sa interview sang Bombo Radyo Bacolod kay Councilor Atty Renecito Novero, na-apresyar sini ang pagfile ni Zamboanga Representative Khymer Olaso sang Death Penalty for Corruption Act.
Nagapati ini nga ang tikang ang pagpakita lamang sang pagkataka sa nagakatabo sa political, moral kag governmental environment.
Aminado si Novero nga latom nagid kurapsyon sa gobyerno man ukon sa pribado nga sektor sa Pilipinas.
Kun sa diin, kaangay nga wala na sang may ginahimo kag wala sang gahom nga makahatag sang penalidad ukon wala sang may mabaskog nga resolve nga sa pagdeklarar sang kurap nga public official.
Aminado si Novero, nga ang hagna ang kaangay nga wala sang tyansa nga mapasar, apang ginbuksan sini ang pinsar sang kadam-an, sa paghimo sang tikang batok sa naglala na nga kurapsyon.
Halimbawa sini ang procurement sa gobyerno, nga ginabakal sang opisyal sa barato nga balor, apang halos tunga naman ang kataason sang ginadeklarar nga balor sa pagkuha sang pondo sa gobyerno, agud ang sobra ang ila nga tulungaon.
Ginatawag ang mga ini ni Novero nga murderous act, bangod ang ginkawat sa pondo sang gobyerno ang magamit pa kuntani sa pagbakal sang bulong, pagpakay-o sang ospital; subong man nagaguba sang bwas damlag sang kabataan, nga kuntani mabuligan sang kwarta.
Apang suno diri, dapat naghatag sang qualification sa minimum kag maximum amount sang ginkawat sang opisyal nga masentensyahan.
Para kay Novero, sobra-sobra man ang sentensya nga death penalty, nga kuntani bisan live imprisonment na lamang.
Ginakasubo kag ginakaugot sang abogado nga sa nahibaluan sini, ang nagakaconvict lamang sa mga corruption charges ang yara sa libo-libo ang ginkawat nga balor ukon halos indi salapakon, kag iban diri ang mga staff nga naulamid lamang sa away sang mga politiko.
Samtang ang mga nagakawat sang ginatos ka milyon ang tanan nagaka-acquit sa kaso, nga nagapakita sang indi patas nga hustisya.
