BACOLOD CITY-Aminado si Police Lt. Col. Ariel Pico, spokesperson sang Bacolod City Police Office (BCPO) nga mas diutay ang mga locally stranded individuals nga nagakuha sang travel authority subong nga semana kun ipaanggid sang tinalikdan nga semana.
Sa interview sang Bombo Radyo, ginpaathag ni Pico ang tatlo ka mga requirements para sa mga locally stranded individual (LSI) nga luyag maglakat sa gwa sang Region 6.
Kinahanglan lang nga kumpletuhon sang mga nastranded ang barangay accomplished form para sa mga LSI, quarantine certificate kun nakapaidalom ini sa quarantine, kag ang medical certificate nagikan sa City Health Office.
Samtang ginaseguro sini nga nakahanda magpirma ang city director sa Bacolod City Police Office bangod yara lang ini sa opisina 24 oras.
Ginkumpirmar man sini nga kaupod nga nagakuha sang travel order ang mga stranded nga magapauli sa Negros Oriental.
